Во рамките на собраниските дебати поврзани со тековниот ребаланс на буџетот, со загриженост ги забележуваме обидите на еден пратеник од македонското собрание за користење на статусот “сметководител” во негативен и пејоративен контекст, со цел да се омаловажат носителите на јавните функции.
Поразително е кога во недостиг на издржани економски аргументи, се посегнува по понижување на цела една професија која е од витално значење за државата. Сметководителите не се алатка за политички пресметки. Тие се неизоставен столб на фискалниот систем, чувари на финансиската законитост и дисциплина, како и луѓе кои со децении го носат товарот на даночниот и фискалниот систем на Македонија на своите плеќи. Нивната секојдневна работа е клучна за препознавање, лоцирање и санирање на сите аномалии во финансиското работење.
За разлика од праксата во минатото со нереални проекции и прикривање на финансиските обврски, управувањето со јавните финансии бара прецизност, транспарентност и соочување со реалната состојба со чисти сметки.
На пратеникот му укажуваме дека сметководителите се високопрофесионални кадри со докажан интегритет, кои со апсолутна посветеност ги пресметуваат фискалните давачки и директно придонесуваат кон даночната и економската стабилност на државата. Потценувањето на нивниот труд е потценување на целиот деловен и економски систем.
Наместо лични и професионални дисквалификации, јавниот дискурс наметнува потреба од почит кон сметководствената професија и конструктивна дебата базирана на факти. Затоа, очекуваме јавно извинување за користењето на статусот “сметководител” во негативен и потценувачки тон.
Совет за унапредување и надзор над
сметководствената професија на
Република Македонија
