По речиси една година од моментот кога „Трамп Мобајл“ започна да собира депозити од 100 долари за својот најавен паметен телефон, уредот конечно се приближува до испорака. Компанијата соопшти дека првите примероци од таканаречениот „позлатен“ „Трамп Телефон“ ќе почнат да се доставуваат оваа недела, иако околностите околу неговото лансирање остануваат далеку од јасни.
Станува збор за моделот „Трамп Мобајл Т1“, кој се продава по цена од 499 долари и кој, според медиумски извештаи, во голема мера потсетува на поевтин уред од кинеско производство што на некои пазари се нуди за помалку од 200 долари. Иако промотивно беше најавуван како амбициозен проект, финалната верзија изгледа поедноставена, со помал екран и поскромни технички перформанси. Она што останува непроменето е агресивниот брендинг и препознатливата златна естетика поврзана со името „Трамп“.
Контроверзии дополнително ги засили и промената на условите за преднарачка. Како што забележуваат медиуми, новите формулации јасно наведуваат дека компанијата не гарантира ниту производство, ниту достапност на уредот, а уплатениот депозит претставува само „условна можност“ за купување – доколку уредот воопшто биде пуштен во продажба.
Сепак, по долга пауза во комуникацијата, „Трамп Мобајл“ неодамна се огласи преку серија објави на социјалните мрежи, во кои им порача на купувачите дека ќе добијат е-пошта со информации и дека испораките конечно започнуваат. Интересно, компанијата истовремено го ограничи и јавниот одговор, исклучувајќи ги коментарите под објавите.
Од компанијата тврдат дека доцнењето е резултат на сложениот развој на технологијата, тестирањето на компонентите и логистичките предизвици околу производство на Android уред. Извршниот директор посочи дека ваквите процеси често траат значително подолго од очекуваното, особено кога се работи за нов производ на пазарот.
Експерти од технолошката индустрија, пак, истакнуваат дека развојот на ваков тип смартфон обично бара повеќегодишна подготовка, вклучително софтверски интеграции и договори со повеќе производители, што дополнително ја става под знак прашалник првичната временска рамка на проектот.
Дополнителна дебата предизвика и маркетиншката порака дека телефонот е „произведен во САД“, која подоцна беше модифицирана во понејасна формулација дека уредот е „дизајниран со американски вредности“. Аналитичари предупредуваат дека ваквите термини оставаат простор за различни толкувања за вистинското место на производство и склопување.
Скептицизмот околу проектот се засили откако индустриски аналитичари посочија дека спецификациите на уредот многу наликуваат на веќе постоечки модели од азиски производители. Дел од критиките се насочени и кон прашањето како брендот на поранешниот претседател се монетизира преку вакви производи, додека компанијата зад проектот формално останува под контрола на неговото семејство.
На сето ова се надоврзаа и политички реакции, при што дел од критичарите го опишаа доцнењето и промените во проектот како уште еден пример за спорна деловна пракса.
Во меѓувреме, вниманието го привлече и цената на тарифниот план за уредот, поставена на 47,45 долари месечно, симболична референца на претседателските мандати на Доналд Трамп како 45-ти и 47-ми претседател на САД, што дополнително ја нагласува политичко-комерцијалната димензија на целиот проект.
…
