Американското Федерално истражно биро (ФБИ) започнало широка повеќеагенциска истрага по серија мистериозни смртни случаи и исчезнувања на врвни американски научници поврзани со воздушната, нуклеарната и одбранбената индустрија, објавија повеќе профили и извори на социјалните мрежи.
Според информациите што кружат на интернет, истрагата опфаќа најмалку 12 случаи во последните четири години, а последниот наводен инцидент дополнително ја зголемил загриженоста во американската јавност.
Во центарот на вниманието е случајот со инженерот Лебланк, кој работел на идни мисии за Марс. Според објавите, неговото семејство пријавило исчезнување, а неколку дена подоцна неговото возило било пронајдено целосно изгорено на рурален пат во американската сојузна држава Алабама. Наводно биле потребни денови форензички анализи за да се потврди неговиот идентитет.
Во објавите се тврди дека овој случај е дел од поширока федерална истрага во која се споменуваат и пензиониран генерал на американските воздухопловни сили, истражувач од лабораторијата „Лос Аламос“, како и инженер на НАСА кој исчезнал без трага во шумска област во близина на Лос Анџелес.
Според текстот што масовно се споделува на социјалните мрежи, директорот на ФБИ, Каш Пател, наводно потврдил дека Бирото координира информации со Министерството за енергетика, Министерството за одбрана и локалните власти.
Иако засега нема официјална потврда дека случаите се меѓусебно поврзани, објавите тврдат дека серијата исчезнувања и смртни случаи предизвикала сериозна загриженост во американската безбедносна и научна заедница.
Во дел од реакциите на интернет, корисници веќе го споредуваат целиот случај со сценарија од научно-фантастични серии и филмови, особено поради фактот што дел од исчезнатите научници работеле на чувствителни проекти поврзани со вселената, квантните технологии и одбранбените системи.
Сепак, засега нема официјално соопштение од американските институции кое целосно ги потврдува деталите што се шират на социјалните мрежи, а дел од јавноста бара дополнителна проверка на информациите и официјална реакција од ФБИ и Министерството за правда на САД.
