Секојдневното консумирање на само околу 50 грама преработено месо, што одговара на приближно две парчиња шунка, може да го зголеми ризикот од развој на дијабетес тип 2 за 15 проценти во следните десет години, покажува голема меѓународна студија објавена во престижното научно списание The Lancet.
Истражувањето го спровеле научници од Универзитетот во Кембриџ, кои наведуваат дека резултатите дополнително ги потврдуваат препораките за ограничување на внесот на преработено и црвено месо.
Во студијата биле опфатени речиси 1,97 милиони возрасни лица од 20 земји на пет континенти, што ја прави една од најголемите досега спроведени анализи од ваков вид. Истражувачите ги анализирале навиките во исхраната и здравствената состојба на испитаниците за да утврдат дали постои поврзаност меѓу консумирањето месо и појавата на дијабетес тип 2.
Резултатите покажале дека лицата кои секојдневно внесуваат околу 50 грама преработено месо имаат 15 проценти поголем ризик да развијат дијабетес тип 2 во споредба со оние кои го консумираат поретко.
Истражувањето покажува дека ризик постои и кај непреработеното црвено месо. Дневен внес од околу 100 грама говедско или друго црвено месо е поврзан со 10 проценти поголем ризик од појава на дијабетес тип 2.
Научниците анализирале и месо од живина. Според резултатите, секојдневното консумирање околу 100 грама пилешко или друго месо од живина е поврзано со осум проценти поголем ризик од развој на дијабетес тип 2. Сепак, авторите нагласуваат дека се потребни дополнителни истражувања за подобро да се објасни оваа поврзаност.
Експертите потсетуваат дека во последните неколку децении значително се зголемиле и производството и потрошувачката на месо, додека бројот на заболени од дијабетес тип 2 постојано расте. Според проценките, денес околу 500 милиони луѓе ширум светот живеат со ова заболување, а до 2050 година таа бројка би можела да се удвои.
Авторите на студијата заклучуваат дека разновидната и урамнотежена исхрана, со ограничен внес на преработено и црвено месо, може да придонесе за намалување на ризикот од развој на дијабетес тип 2 и други хронични заболувања.
