Исчезнувањето на Александар Нешовиќ – Баја, човек кој со години бил познат на белградската јавност, прерасна во една од најголемите криминалистички истраги во Србија во последниот период. По неколкудневна потрага и обемна акција на полицијата и обвинителството, досега се уапсени 10 лица, меѓу кои и високи полициски функционери, додека истражителите се обидуваат да откријат што точно се случило во ноќта на 12 мај во ресторан на Сењак.
Според досегашните информации, Нешовиќ последен пат бил виден во ресторанот „Ресторан 27“, каде пристигнал со својот црн БМВ X7 за средба со познаници. Возилото го оставил пред самиот локал, а околу 23 часот телефонски разговарал со својата невенчана сопруга Ј.М., на која ѝ рекол дека е во ресторанот со пријатели.
Веднаш потоа неговиот мобилен телефон бил исклучен и секоја трага од него исчезнала.
Неговата сопруга следниот ден официјално го пријавила исчезнувањето, по што во случајот се вклучиле припадници на Управата на криминалистичката полиција и Вишото јавно обвинителство.
Истражителите влегле во ресторанот вечерта на 13 мај и таму откриле вознемирувачки докази.
Форензичарите пронашле две чаури од калибар 9 милиметри, како и повеќе траги од крв за кои постои сомневање дека му припаѓаат на Нешовиќ. Увидот траел со часови, а истражителите користеле специјални хемиски средства за откривање траги што, според нивните сомнежи, некој се обидел да ги исчисти од подот и од внатрешноста на локалот.
Во близина на ресторанот, во контејнер, бил пронајден и ајфон, за кој засега не е утврдено кому му припаѓа, но се проверува дали има поврзаност со случајот.
Истрагата потоа брзо се проширила и довела до серија апсења. Како главни осомничени за обид за тешко убиство, нелегално поседување оружје и предизвикување општа опасност се приведени С.В. и М.С. Полицијата истражува дали по пукањето биле организирани активности за прикривање на трагите и помагање на сторителите да избегаат.
Меѓу уапсените е и Д.В., сопруга на осомничениот С.В., која според истрагата наводно донела оружје од тајна локација, таканаречен „штек“. Под сомнение дека помогнале во прикривање на злосторството, приведени се и сопственикот на ресторанот Н.Л., како и келнерот кој бил на смена таа вечер.
Дополнително, полицијата го уапсила и Д.С. (51), за кого постои сомневање дека по пукањето им помогнал на осомничените да се сокријат и ги одвел во Јаково. При неговото приведување биле пронајдени пасоши и околу 10.000 евра.
Во истрагата е опфатен и поранешниот началник на белградската полиција Веселин Милиќ, како и тројца полицајци, поради сомневања дека помагале во прикривање на случајот и уништување на докази.
Случајот предизвика огромно внимание во Србија, особено затоа што Нешовиќ пред само четири месеци преживеал обид за ликвидација на Сењак, кога бил нападнат од платени убијци.
Истражителите сега проверуваат дали двата инциденти се поврзани и дали станува збор за пресметка меѓу криминални структури.
Иако истрагата е во тек, судбината на Александар Нешовиќ – Баја сè уште официјално не е разјаснета, а српските медиуми случајот веќе го нарекуваат една од најмрачните криминални приказни во Белград оваа година.
