Хрватска усвои закон со кој професионалните возачи ќе можат да добиваат долгорочни визи, потег што се оценува како големо олеснување за транспортниот сектор и за македонските возачи кои секојдневно работат на европските рути.
Веста ја соопшти вицепремиерот Александар Николоски, кој посочи дека станува збор за реализација на договор постигнат во јануари годинава со хрватскиот вицепремиер и министер за транспорт Олег Бутковиќ.
Според Николоски, новото законско решение е важен чекор во надминување на проблемите што се појавија по воведувањето на ЕЕС системот во Шенген зоната, кој создаде дополнителни ограничувања и административни потешкотии за професионалните возачи од земјите кои не се членки на Европската Унија.
„Ова многу ќе им помогне на македонските професионални возачи. Продолжуваме кон конструктивни решенија за нивните проблеми“, порача Николоски.
Тој додаде дека Швајцарија веќе издава долгорочни визи за професионални возачи, а очекувањата се и други европски држави да го следат истиот пример со цел да се олесни меѓународниот транспорт и движењето на транспортните работници низ Европа.
Превозниците подолг период предупредуваа дека новите правила во Шенген создаваат сериозни проблеми за возачите кои често престојуваат во земјите на ЕУ поради природата на работата, па ваквите долгорочни визи се гледаат како значително олеснување за целиот сектор.
…
