Во време кога глобалната економија се соочува со војни, растечка инфлација и нестабилни пазари, македонските претприемачи одлучно го кршат трендот на застој. Во 2025 година, бројот на новоосновани фирми достигна 9.476, што е за 1.297 повеќе отколку во 2024 година, според податоците на БизнисМрежа. Тоа е јасен сигнал дека желбата за сопствен бизнис во Македонија повторно расте.
Најмногу нови компании се формирани во трговијата, услугите и градежништвото – сектори со релативно лесен пристап и побрз старт на работа. Трговијата останува лидер, иако во пад: 1.762 нови фирми започнале со работа во 2025 година, споредено со 1.818 во 2024 и 2.204 во 2023 година.
Услужните дејности доживуваат вистински бум – во 2025 година започнале 1.554 нови фирми, од фризерски и козметички салони до услуги за одржување, перење и хемиско чистење. Овој сектор, кој претходно не беше дел од топ 5, покажува дека малите и микробизнисите базирани на лични вештини можат да го наметнат својот раст.
Градежништвото продолжува стабилно да расте, со 952 нови фирми, што одговара на активноста на градилиштата низ државата и зголемената побарувачка за нови станови. Смeстувањето и угостителството повторно се на четвртото место со 947 новоотворени компании, што е раст од 144 во споредба со претходната година.
Стручните, научни и технички дејности, како и преработувачката индустрија (813 фирми) и транспортот и складирањето (686), покажуваат дека македонските претприемачи се охрабруваат да истражуваат различни економски полиња. Технологијата и информациските услуги се сè поприсутни – 399 нови фирми во овој сектор укажуваат на постепен раст на иновациите.
Меѓутоа, не сите сектори се привлечни за нови компании. Финансиските и осигурителните услуги бележат само 23 нови фирми, управувањето со вода и отпад 19, рударството 18, а јавната управа само 8 нови субјекти.
И покрај сите предизвици – нестабилни финансиски услови, поскапување на кредитите и нарушени синџири на снабдување – македонските претприемачи ја гледаат шансата каде другите гледаат ризик. Побрзо стартување, пониски трошоци и фокус на вештините стануваат главните двигатели на новиот бран претприемништво во земјата.
Извор: Пари.мк
