Европската унија и САД направија уште еден чекор кон имплементација на нивниот нов трговски договор, откако институциите во Брисел постигнаа политичка согласност околу правната рамка што треба да го спроведе веќе договорениот царински режим.
По завршените преговори меѓу Европскиот парламент и земјите-членки, од Кипарското претседателство со Советот на ЕУ беше потврдено дека е усогласен пакет регулативи кои го претвораат политичкиот договор во конкретни правила за трговија.
Суштината на договорот значи значително отворање на европскиот пазар за американски стоки, особено во индустрискиот сектор, како и проширување на пристапот за земјоделски и рибни производи од САД. Во исто време, ЕУ се обврзува на постепено укинување на преостанатите царини за индустриските производи од американско потекло.
Овој потег доаѓа во период на зголемени тензии меѓу двете страни, откако американскиот претседател Доналд Трамп упати критики дека Европската унија не ги почитува договорените обврски и најави можност за зголемување на царините за европски автомобили и товарни возила.
За да се намали ризикот од евентуални еднострани потези, во договорот е вграден заштитен механизам што ѝ овозможува на ЕУ да ги суспендира трговските поволности доколку дојде до прекршување на договорените услови од американска страна.
Претседателот на Комитетот за меѓународна трговија во Европскиот парламент, Бернд Ланге, оцени дека процесот бил политички тежок, но на крајот функционален, со напомена дека ефектите врз европската економија ќе бидат предмет на нова проценка во 2029 година.
Првичниот политички договор беше постигнат во август 2025 година меѓу Вашингтон и Брисел, кога се утврди дека американските царини за повеќето европски производи ќе бидат ограничени на максимум 15 проценти.
Во замена, европската страна прифати поширок пристап за американските земјоделски производи, меѓу кои свинско месо и млечни производи, како и целосно олеснување на царините за индустриски увоз од САД.
Иако регулативите се веќе усогласени на политичко ниво, тие сè уште треба формално да бидат потврдени од Европскиот парламент и земјите-членки, по што нивната примена се очекува најдоцна до почетокот на јули.
…
