Собранието денеска ја отвора 102. седница со обемен и разновиден дневен ред, на кој се наоѓаат и законски решенија од повеќе сектори, како и прашања од стратешко и меѓународно значење. Дополнителна динамика на расправата ќе донесат и двочасовните пратенички прашања од опозицијата, кои традиционално внесуваат политичка дебата во работата на законодавниот дом.
Меѓу точките што ќе се разгледуваат е и одлуката за испраќање припадник на Армијата во мисијата на Европската Унија „АЛТЕА“ во Босна и Херцеговина, за која претходно ќе се произнесе и Комисијата за одбрана и безбедност. Пратениците треба да се изјаснат и за повеќе закони, меѓу кои се и оние за младинскиот додаток и за индустриските зелени зони, двата во второ читање, како и за фискалната стратегија на државата за периодот 2027–2031 година.
По скратена постапка е предвидено донесување на низа измени во клучни законски решенија: од законите за Владата, медијацијата, образованието, здравството и здравственото осигурување, па сè до социјалната заштита и локалната самоуправа. На листата се и измени поврзани со студентскиот и ученичкиот стандард, јавните патишта, јавното претпријатие „Македонска радиодифузија“, како и законските решенија за внатрешни работи и полиција. Дел од пакетот се однесува и на финансиска поддршка за ранливи категории граѓани во услови на ценовни притисоци, како и на поддршка на инвестициите.
На седницата ќе се најде и предлог-закон за ново задолжување на државата преку повеќе меѓународни финансиски институции и банки, наменето за општи буџетски потреби, капитални инвестиции и рефинансирање постојни обврски, што дополнително ја нагласува финансиската тежина на дневниот ред.
…
