Со благослов на Варненскиот и Великопреславски митрополит Јоан, во Варна ќе биде подигнат споменик посветен на Светите браќа Кирил и Методиј и нивните ученици – Свети Климент, Свети Наум, Свети Горазд, Свети Сава и Свети Ангелариј.
Споменикот претставува донација од Варненскиот слободен универзитет „Црноризец Храбар“, по повод 35-годишнината од неговото основање, јавува БГНЕС.
Во проектот се вклучи и Здружението „Бугарски родољубци“, а иницијативата доби широка поддршка од повеќе од 30 организации, како и од претставници на локалната самоуправа, културни и образовни институции и граѓани на Варна.
Претседателот на универзитетот, Красимир Недјалков, истакна дека Светите Седмочисленици претставуваат духовен ориентир и симбол на просветата и духовната сила.
„Верувам дека овој споменик ќе остане за идните генерации како израз на почит кон културното наследство и порака дека без знаење, духовност и историска меморија нема иднина“, изјави Недјалков.
Универзитетот ќе покрие околу 70 проценти од трошоците за изградбата, а идејното решение е донација од студенти и професори.
Споменикот е предвидено да биде поставен на плоштадот „Св. св. Кирил и Методиј“ во Варна, по што ќе биде предаден на трајно користење на Општина Варна. Иницијативниот комитет веќе ја започна потребната законска постапка за реализација на проектот.
