Млада мечка веќе неколку дена предизвикува загриженост кај жителите на Битола и околните села, откако на социјалните мрежи беа објавени повеќе видео-снимки од нејзиното движење низ населени места и во близина на градот.
Според сведоштва на граѓани, мечката најпрво била забележана во атарите на селата Трн, Оптичари и Гнеотино, каде што талкала низ нивите и земјоделските површини во потрага по храна.
Дополнителна вознемиреност предизвикала снимката направена синоќа, на која се гледа мечката во близина на Градското Шеталиште и стадионот во Битола.
Граѓаните велат дека се чувствуваат несигурно и апелираат до надлежните институции итно да преземат мерки за безбедност и соодветно згрижување на животното, со цел да се избегнат можни несакани инциденти.
На социјалните мрежи продолжуваат да се споделуваат снимки и информации за движењето на мечката, додека жителите внимателно ја следат ситуацијата.
Видеото може да го погледнете на Nezavisen.mk
…
