Тешка сообраќајна несреќа со трагични последици се случила доцна синоќа на скопската обиколница, во близина на Радишани, при што животот го загубиле најмалку четири лица. Според првичните информации, во сударот учествувале патничко возило „БМВ“ и камион со косовски регистарски таблички.
Несреќата се случила околу 23:30 часот, а ударот бил толку силен што автомобилот веднаш бил зафатен од пламен и целосно изгорел. Екипи на полицијата, противпожарната служба и Итната медицинска помош интервенирале на местото, додека увидот траел во текот на ноќта.
Неофицијално, како можна причина за трагедијата се посочува навлегување на камионот во спротивната сообраќајна лента. Според информации објавени од Алсат, постои сомнеж дека возачот на товарното возило изгубил контрола поради замор непосредно пред судирот.
Засега нема официјална потврда од Министерството за внатрешни работи за идентитетот на загинатите, ниту за точните околности под кои се случила несреќата. Не е познато дали жртвите биле членови на едно семејство или група млади лица, а според првичните информации не се исклучува можноста меѓу нив да имало и деца.
Надлежните институции најавуваат повеќе детали по завршувањето на истрагата и официјалната идентификација на жртвите.
…
