Започна акција за уредување и подобрување на изгледот на Железничката станица во Скопје, при што веќе се реализираат првите активности насочени кон враќање на функционалноста и уредениот изглед на објектот.
За преземените активности информираше Ивановски, кој посочи дека се работи на подигнување на нивото на надворешниот и внатрешниот изглед на станицата преку долгорочна акција и сет мерки што постепено ќе се реализираат.
„Преземаме мерки за подигнување на нивото на надворешниот и внатрешниот изглед на Железничката станица Скопје преку долготрајна акција и сет активности“, напиша Ивановски.
Како дел од првичните чекори, веќе се отстранети сите билборди и светлосни реклами поставени во објектот. Според информациите, останала уште една светлосна реклама на „Хамза донер“, а доколку таа не биде отстранета во рок од седум дена, ќе следува раскинување на договорот за закуп.
Покрај рекламите, отстранети се и голем број информативни постери кои со години биле наталожени во станицата, а паралелно продолжуваат и активностите за генерална хигиена и чистење на просторот.
Ивановски најави дека процесот нема да заврши само со чистење, туку следува и целосна реконструкција на Железничката станица, која ќе се реализира во соработка со експерти од Архитектонскиот факултет и Институтот за земјотресно инженерство и инженерска сеизмологија (ИЗИИС).
„Процесот на враќање на нормалниот изглед на железничката станица нема да биде лесен процес, но да почнеме денес“, порача Ивановски.
Железничката станица во Скопје со години претставува едно од најфреквентните места во главниот град, а најавените активности имаат цел да обезбедат поуреден, почист и функционален простор за граѓаните и патниците.
