Украина беше погодена од еден од најголемите воздушни напади во последниот период, откако Русија во текот на ноќта изврши масовен комбиниран напад со ракети и беспилотни летала, главно насочен кон Киев и околните региони.
Според мониторинг групите, кон украинска територија биле лансирани повеќе од 50 ракети и над 700 дронови, при што најголемиот дел биле насочени кон главниот град.
Новинарите на „Киев Индепендент“ известуваат дека првите силни експлозии во Киев биле регистрирани околу 1 часот по полноќ по локално време, а нови бранови напади следувале помеѓу 3 и 5 часот наутро. Во текот на ноќта биле активирани предупредувања за воздушна опасност во сите региони на Украина.
Украинските воздухопловни сили соопштиле дека десетици ракети и стотици беспилотни летала се движеле кон главниот град. Во текот на нападите било издадено и предупредување за можна употреба на руска балистичка ракета со среден дострел „Орешник“, но официјална потврда за нејзина употреба засега нема.
Градоначалникот на Киев, Виталиј Кличко, изјавил дека последици од нападот се регистрирани во сите делови на градот.
Според официјалните податоци, најмалку едно лице загинало, додека 21 лице се повредени, од кои 13 се пренесени на болничко лекување.
Во нападите биле оштетени најмалку седум станбени згради во областите Оболонски, Шевченковски, Днепровски, Холосиевски, Соломјански и Печерски. Покрај тоа, погодени биле и неколку семејни куќи.
Штетите не се ограничиле само на станбени објекти. Според извештаите, оштетени се супермаркет, трговски центар, деловна зграда, студентски дом, бензинска станица, гаражи, паркирани возила и магацински објекти во различни делови од Киев.
Новинарите од терен пријавиле и голем пожар во близина на метро станицата „Контрактова Плоштад“. Директорот на украинската поштенска служба „Укрпост“, Игор Смиљански, потврдил дека оштетено е и седиштето на компанијата во централниот дел на градот.
Напади биле регистрирани и надвор од Киев. Во околниот регион повредени се три лица, потврди гувернерот Микола Калашник.
Според неговите информации, погодени биле населбите Фастив, Буча, Бровари, Била Церква, Вишхород и Бориспиљ, каде биле оштетени куќи, станбени објекти, деловни простории, гаражи и магацини.
Извештаи за експлозии пристигнале и од Черкаси, Кропивницки и регионот Хмелницки.
По нападот, полските воздухопловни сили соопштиле дека биле активирани полски и сојузнички борбени авиони за дополнителна заштита на воздушниот простор на Полска.
Нападот следува само неколку часа откако украинскиот претседател Володимир Зеленски предупреди дека Русија подготвува поширок комбиниран напад врз украинска територија.
„Гледаме знаци за подготовки за поширок напад со различни видови оружје врз Украина, вклучително и Киев“, изјавил Зеленски.
Слично предупредување претходно издала и американската амбасада во Киев, која информирала за можност од значителен воздушен напад во следните 24 часа.
Русија првпат ја употреби ракетата „Орешник“ против Украина во ноември 2024 година во напад врз Днепар, а според претходните информации, последна употреба била регистрирана во јануари годинава врз регионот Лавов.
Пред нападите врз Киев, пријавени биле и напади врз Одеса и Харков, каде исто така имало повредени цивили.
