Турската полиција во неделата упадна во седиштето на главната опозициска партија во земјата, откако судската одлука за смена на нејзиното раководство предизвика политичка криза и судири меѓу поддржувачите на различни фракции.
Според извештаите, припадници на специјалната полиција насилно влегле во седиштето на Републиканската народна партија (CHP) во Анкара, при што употребиле солзавец за да ги оттурнат насобраните членови и поддржувачи кои претходно ги блокирале влезовите со импровизирани барикади.
Снимките од местото на настанот покажуваат хаотични сцени – лица од внатрешноста на објектот фрлале предмети кон влезот, додека полицијата била прскана со црева со вода.
Инцидентот следува само неколку дена откако Апелацискиот суд ја поништи лидерската позиција на Озгур Озел, актуелен лидер на CHP, со што дополнително се продлабочија политичките тензии во земјата.
Судот одлучил Озел да биде заменет со Кемал Киличдароглу, 77-годишен долгогодишен партиски функционер и поранешен претседателски кандидат, кој беше поразен од претседателот Реџеп Таип Ердоган на изборите во 2023 година.
Турските медиуми објавија дека претставници на Киличдароглу побарале полицијата да ги спроведе „неопходните процедури“ за предавање на партиското седиште на новото раководство, тврдејќи дека им бил забранет пристап.
Потоа гувернерот на Анкара издал наредба полицијата да ја „спроведе судската одлука“, се наведува во официјално соопштение.
„Под напад сме“, изјавил Озгур Озел во видео порака објавена на социјалната мрежа Икс, додека безбедносните сили се обидувале да влезат во зградата.
Подоцна тој го напуштил седиштето на партијата опкружен со поддржувачи и се упатил кон турското Собрание.
„Се обидоа да нè искорнат и да нè исфрлат“, изјавил Озел пред насобраните граѓани, додавајќи дека партијата отсега ќе биде „на улиците и плоштадите, марширајќи кон власта“.
Во меѓувреме, организацијата за човекови права Human Rights Watch предупреди дека владата на Ердоган применува „злоупотребувачки тактики“ против CHP и оцени дека ваквите потези претставуваат удар врз турската демократија.
Од друга страна, турскиот министер за правда Акин Гурлек изјавил дека одлуката на Апелацискиот суд „ја зајакнува довербата на граѓаните во демократијата“.
Одлуката на судот ја поништи пресудата од 2025 година со која беа отфрлени обвинувањата за купување гласови за време на внатрепартиските избори кога Озгур Озел беше избран за лидер на опозицијата.
Случувањата доаѓаат во период на растечки политички тензии во Турција, каде претседателот Реџеп Таип Ердоган, кој е на власт од 2003 година, се соочува со нови критики од опозицијата за притисок врз политичките противници.
