Американскиот претседател Доналд Трамп изјави дека САД се блиску до постигнување договор со Иран, но нагласи дека Вашингтон нема да брза со финализирање на процесот. Според него, американската блокада на иранските бродови и пристаништа во Ормускиот Теснец ќе остане на сила сè додека не биде постигнат и официјално потпишан конечен договор меѓу двете земји.
„Американската блокада на иранските бродови во Ормускиот Теснец ќе остане целосно во сила сè додека договорот не биде постигнат, заверен и потпишан“, напиша Трамп на неговата социјална мрежа „Трут Соушл“.
Тој посочи дека процесот не треба да се избрзува и дека двете страни мора да одвојат доволно време за договорот да биде завршен правилно и без грешки.
Во меѓувреме, високи претставници од американската администрација открија дека преговарачките тимови би можеле да добијат рок од 60 дена за да стигнат до конечен договор.
Од иранска страна засега нема официјална реакција, но медиуми блиски до Револуционерната гарда објавија дека сè уште постојат сериозни пречки во разговорите. Според нив, едно од главните спорни прашања останува барањето на Техеран за ослободување на замрзнатите финансиски средства.
Само ден претходно Трамп изјави дека Вашингтон и Техеран во голема мера усогласиле меморандум за разбирање, кој би можел да претставува основа за идниот мировен договор и повторно отворање на Ормускиот Теснец – стратешка точка низ која минува голем дел од светскиот транспорт на нафта и течен природен гас.
Американскиот претседател истакна дека евентуалниот договор ќе биде значително поразличен од нуклеарниот договор склучен за време на администрацијата на Барак Обама.
„Ако склучам договор со Иран, тој ќе биде добар и правилен, а не како оној што го склучи Обама“, порача Трамп, додавајќи дека нема намера да прави „лоши договори“.
Државниот секретар Марко Рубио потврди дека разговорите продолжуваат, но додаде дека е потребно време за Иран да одговори на понудените услови.
И покрај тоа што кревкото примирје е во сила од почетокот на април, меѓу двете страни остануваат сериозни разлики околу неколку клучни прашања. Меѓу нив се иранската нуклеарна програма, регионалните безбедносни прашања, конфликтите поврзани со проиранските структури на Блискиот Исток, како и барањето на Техеран за укинување на санкциите и ослободување на милијарди долари замрзнати нафтени приходи.
Развојот на овие преговори внимателно се следи на глобално ниво, имајќи предвид дека секоја промена околу Ормускиот Теснец директно влијае врз светските енергетски пазари и цените на нафтата.
