По свлечиштето што се случи на градилиште во реонот на булеварот „Митрополит Теодосиј Гологанов“, во близина на Католичката црква во Скопје, институциите покренаа засилени инспекциски контроли и најавија серија мерки против одговорните за изведбата.
Инцидентот, кој предизвика оштетувања на јавната инфраструктура, го зафати коловозот, тротоарите, дел од канализациската мрежа и уличното осветлување. На терен интервенираа општинските инспекциски служби на Општина Центар, во координација со Министерството за внатрешни работи, Државниот градежен инспекторат и секторот за урбанизам, при што беа утврдени и неправилности во текот на градежните активности.
Веднаш по настанот, просторот беше обезбеден со заштитни ленти и сигнализација за да се спречи пристап на граѓани, имајќи ја предвид близината на станбени згради и интензивното движење во тој дел од градот. Општинските екипи соопштија дека мерките се превентивни и ќе важат сè додека не се стабилизира состојбата на теренот.
Инспекцискиот надзор, кој продолжил и во наредните часови, открил дополнителни пропусти во начинот на изведување на работите. Поради сериозноста на ситуацијата, Општина Центар побара стручно мислење од експерти на Градежниот факултет, со цел да се утврдат ризиците и потребните чекори за санација.
Паралелно, до Основното јавно обвинителство е доставено официјално известување за случајот, а општината најави дека ќе се бара и одземање на лиценците на одговорните лица вклучени во изградбата, како и утврдување на одговорност кај изведувачот и надзорот поради несовесно постапување.
Од Општина Центар порачаа дека нема да се толерираат практики што ја загрозуваат безбедноста на граѓаните и ја оштетуваат јавната инфраструктура. Инвеститорот е задолжен итно да ја стабилизира локацијата, да спроведе санација и целосно да ја врати оштетената инфраструктура во првобитна состојба.
Според првичните информации, за инцидентот прво алармирало здружението „Во одбрана на Буњаковец“, кое на социјалните мрежи објави видео и тврдења дека на терен се работело и во период на државен празник. Тие посочија дека свлечиштето се случило на спојот на улицата „Христо Смирненски“ и булеварот „Митрополит Теодосиј Гологанов“.
Настанот го потврди и МВР, од каде информираа дека при ископ за изградба на станбен објект дошло до свлекување на земјиште. Притоа бил затрупан багер што работел на локацијата, но возачот успеал навреме да излезе и да се спаси.
Во истиот инцидент биле оштетени делови од улицата и тротоарот, а падната бандера завршила врз паркирано возило во непосредна близина. Надлежните институции најавуваат дека истрагата и инспекциските проверки продолжуваат сè до целосно утврдување на причините и одговорноста.
…
