Речиси 7.000 државјани од земји надвор од Европската Унија не успеале да влезат во Шенген-зоната поради пречекорување на дозволениот престој, покажуваат најновите податоци по воведувањето на Европскиот систем за влез и излез (EES).
Станува збор за лица кои престојувале повеќе од дозволените 90 дена во период од 180 дена, што е ограничување кое важи за државјани од трети земји кои немаат право на долгорочен престој во ЕУ.
Според Извештајот за состојбата на Шенген 2026, објавен од Европската комисија, бројот на вакви случаи значително се зголемува. Во првите четири месеци од функционирањето на системот биле регистрирани околу 4.000 прекршувања, додека во следните два месеци бројката пораснала за уште 3.000 случаи.
Од стартот на EES на 12 октомври 2025 година, вкупно околу 30.000 патници биле одбиени на границите на Шенген-зоната. Освен поради пречекорен престој, дел од одбивањата биле поврзани со нерегуларна документација, имиграциски проблеми и безбедносни причини.
Податоците покажуваат дека системот регистрирал повеќе од 60 милиони влезови и излези на државјани од трети земји. Само во 2025 година, на над 1.000 британски државјани им бил одбиен влез во Европската Унија, при што околу 200 случаи биле евидентирани во Франција.
Новиот дигитален систем овозможува автоматско следење на престојот преку биометриски податоци и електронска регистрација на секој влез и излез, наместо досегашното рачно проверување на печати во пасошите.
Во извештајот се наведува дека бројот на биометриски проверки на границите значително пораснал – од околу 17.000 дневно на дури 87.000 проверки дневно.
Иако Европската Унија оценува дека системот генерално придонесува за поголема безбедност и подобра контрола на границите, посочени се и бројни проблеми – технички застои, метеж на граничните премини, нееднаква примена на биометриските проверки и недостиг на обучен персонал.
Дополнително, дел од земјите-членки сè уште имаат потешкотии при размената на биометриски податоци преку Шенгенскиот информациски систем (SIS), поради што EES не функционира целосно унифицирано во целата Шенген-зона.
….
