Во пресрет на Светското првенство во 2026 година, кое треба да се одржи во САД, Мексико и Канада, во јавноста се отвори сериозен правен спор околу продажбата на билети, откако обвинителските канцеларии на Њујорк и Њу Џерси покренаа истрага против Меѓународната фудбалска федерација, објави ЕСПН.
Главните обвинители, Летиција Џејмс и Џенифер Девенпорт, издадоа повици за доставување интерна документација и објаснувања поврзани со начинот на кој ФИФА ги распределувала билетите за натпреварите што ќе се играат на стадионот МетЛајф Стадион во Ист Радерфорд, Њу Џерси, вклучувајќи го и финалето закажано за 19 јули.
Според нивните наводи, истрагата се фокусира на можни неправилности во системот за продажба, кој првпат во историјата на Мундијалите вклучува динамично формирање на цени — модел што ги менува трошоците во зависност од побарувачката. Обвинителите тврдат дека токму тој систем довел до нагли и значајни поскапувања, кои во некои случаи далеку ги надминале цените на претходните турнири.
Во заедничка изјава се наведува дека билетите за дел од натпреварите во периодот од октомври до април поскапеле во просек за околу 34 проценти, што дополнително ги засилило реакциите кај навивачите. Дел од фудбалските организации дури го обвинија Меѓународната фудбалска федерација дека се оддалечува од традиционалната идеја за пристапен и „народен“ турнир.
Истрагата, исто така, проверува дали промените во распоредот на седишта на стадионот можеби ги довеле купувачите во заблуда. Првично, трибините биле поделени во фиксни категории, но подоцна биле воведени нови „премиум“ зони со значително повисоки цени. Обвинителите тврдат дека дел од навивачите кои купиле билети порано завршиле со полоши места од очекуваното, иако првично платиле за повисока категорија.
Дополнително, се испитуваат и поплаки дека некои купувачи воопшто не ги добиле местата што ги одбрале и платиле, туку биле прераспределени во пониски категории, подалеку од теренот или зад головите.
Од страна на Меѓународната фудбалска федерација, пак, се инсистира дека ценовната политика е легитимен одраз на пазарната побарувачка. Претседателот на организацијата, Џани Инфантино, претходно изјави дека спортскиот настан од ваков размер мора да ги следи економските реалности на американскиот забавен пазар, кој е меѓу најразвиените во светот.
Истрагата сега треба да утврди дали во процесот на продажба имало неточни или нецелосни информации за купувачите и дали системот за билети бил транспарентен од почеток до крај.
…
