Карантинот за патниците што беа евакуирани од крузерот „Хондиус“, по појавата на хантавирус на бродот, е продолжен на вкупно 42 дена, соопшти австралиската влада, пренесувајќи нови проценки од здравствените експерти.
Министерот за здравство на Австралија, Марк Батлер, информираше дека лицата кои моментално се наоѓаат во изолација се известени за продолжените мерки и дека, според досегашните медицински следења, сите остануваат во стабилна и добра здравствена состојба.
Изолацијата се спроведува во објект во близина на Перт, во Западна Австралија, каде од 15 мај се сместени шест лица: четворица австралиски државјани, еден постојан жител и еден државјанин на Нов Зеланд. Наместо првично планираниот крај на карантинот на 5 јуни, властите одлучија мерката да се продолжи до 23 јуни, по препорака на здравствените служби.
Случајот со крузерот „Хондиус“, под холандско знаме, се разви во април кога на бродот беше потврдена епидемија на хантавирус. Според досегашните податоци, инфекцијата е потврдена кај 13 патници поврзани со пловилото, додека трагичниот биланс изнесува три смртни случаи.
До 11 мај сите патници биле евакуирани и вратени во своите земји, каде што дел од нив веднаш биле ставени под здравствен надзор и карантински мерки.
Претходно, генералниот директор на Светската здравствена организација, Тедрос Аданом Гебрејесус, истакна дека по 2 мај не се регистрирани нови смртни случаи поврзани со овој вирус, што укажува на стабилизација на состојбата, и покрај строгите мерки што сè уште се во сила.
…
