Во координирани полициски активности спроведени во текот на изминатото деноноќие на повеќе локации низ државата, осум лица биле лишени од слобода поради поседување или сомнение за трговија со наркотични дроги.
Најголем дел од приведувањата се случиле во Скопје, каде што полициски службеници затекнале лица кај кои биле пронајдени марихуана, прашкаста и бела грутчеста материја. Приведени се лица на подрачјата на Бит Пазар, Гази Баба, Центар и Аеродром.
Во Струмица бил приведен 23-годишник кај кого најпрво била пронајдена марихуана, а подоцна при претрес во неговиот дом биле откриени дополнителни количини од дрогата. По наредба на јавен обвинител, тој е задржан во полициска станица.
Во тетовското село Боговиње, пред угостителски објект, биле приведени две лица поради сомнение за неовластено производство и пуштање во промет на наркотични дроги, психотропни супстанции и прекурсори.
Уште едно лице било лишено од слобода во Прилеп, откако при полициска контрола кај него била пронајдена марихуана.
Од Министерството за внатрешни работи информираат дека по целосното документирање на случаите, против сите приведени лица ќе бидат поднесени соодветни пријави.
…
