Владата донесе одлука за продолжување на мерката за намалување на акцизите на нафтените деривати до 15 јуни, со цел дополнително олеснување за граѓаните и стопанството во услови на нестабилни движења на светските пазари на енергенси.
Одлуката беше усвоена на денешната владина седница, а паралелно со тоа е постигнат договор и со најголемиот домашен снабдувач на нафтени деривати, компанијата ОКТА, која од 1 јуни ќе воведе дополнителен попуст од два денари за секој литар гориво.
Според пресметките на Владата, комбинацијата од продолжените намалени акцизи и дополнителниот попуст треба да доведе до значително намалување на малопродажните цени. Очекувањата се дизел горивото да поевтини за околу 6,5 денари по литар, додека бензините да бидат поевтини за околу 1,5 денар по литар.
Од Владата посочуваат дека мерката претставува директна поддршка за граѓаните, транспортните компании, земјоделците и целокупниот бизнис-сектор, бидејќи пониските цени на горивата ќе придонесат за намалување на трошоците за живот и работење, како и за одржување на ценовната стабилност во услови на глобални економски предизвици.
Во владиното соопштение се наведува дека институциите остануваат посветени на политики кои носат конкретни придобивки за граѓаните и ќе продолжат со мерки насочени кон заштита на животниот стандард и зајакнување на економската сигурност.
Премиерот Христијан Мицкоски вчера изјави дека очекува дополнителна стабилизација на цените на горивата и нагласи дека Македонија и понатаму ќе остане меѓу земјите со најниски цени на нафтените деривати во регионот.
Инаку, конечните одлуки за висината на малопродажните цени на горивата ги носи Регулаторната комисија за енергетика, водни услуги и услуги за управување со комунален отпад, која редовно ги усогласува цените согласно движењата на светските пазари.
