Франција и Германија предлагаат нов модел за постепена интеграција на земјите кандидати во Европската Унија, со цел да се даде нов импулс на процесот на проширување и да се забрза приближувањето на Западен Балкан кон европското семејство.
Предлогот е претставен во пресрет на Самитот ЕУ–Западен Балкан што ќе се одржи во Тиват, Црна Гора, а поддршка за иницијативата изрази и претседателот на Европскиот совет, Антонио Кошта.
Според документот подготвен од Париз и Берлин, земјите кандидати би можеле постепено да добиваат одредени придобивки од членството уште пред формалниот влез во Унијата, доколку спроведуваат суштински реформи и ги исполнуваат европските стандарди.
Франција и Германија сметаат дека сегашниот процес на пристапување е премногу формален и сложен, поради што предлагаат поедноставување на процедурите и поголем фокус на реалните реформи, наместо на административните чекори.
Новата концепција предвидува воведување на таканаречени „градежни блокови“ за интеграција, прилагодени на секоја земја кандидат поединечно. Напредокот би бил наградуван со конкретни придобивки, како што се привилегиран пристап до единствениот европски пазар, учество на состаноци со европските институции и статус на набљудувач во одредени тела на ЕУ.
Во документот се нагласува дека овие придобивки би можеле да бидат повлечени доколку земјата назадува во реформите или ги прекршува основните вредности и принципи на Европската Унија.
Меѓу предложените мерки се и заеднички парламентарни комитети, состаноци со европратеници и претставници на Европската комисија, како и можност кандидатите да учествуваат на неформални состаноци на Советот на ЕУ без право на глас.
Франција и Германија бараат од Европската комисија да го разработи концептот во конкретен предлог, кој би можел да стане основа за идните разговори за проширување на Унијата.
Европскиот совет оценува дека иницијативата покажува силна политичка волја и кај земјите членки и кај кандидатите за успешно продолжување на процесот на проширување.
