Министерот за внатрешни работи Панче Тошковски најави можни законски измени со кои би се вовеле построги правила за користење на електричните тротинети, оценувајќи дека тие претставуваат сериозен безбедносен предизвик во сообраќајот.
Тошковски истакна дека Министерството веќе ги анализира искуствата и решенијата што ги применуваат повеќе европски земји, а во тек е подготовка на законски измени кои треба да придонесат за поголема безбедност на патиштата.
„Мислам дека треба да одиме со порадикални решенија, особено во делот на забраните, воведување старосна граница и можеби регистрација на електричните тротинети. Тие претставуваат огромен предизвик за безбедноста во сообраќајот и очекувам конкретни решенија во најбрз можен рок“, изјави Тошковски.
Според него, целта на мерките е да се намалат ризиците за сите учесници во сообраќајот и да се воспостават појасни правила за користење на овие превозни средства.
Министерот најави дека реформите во сообраќајната сфера ќе продолжат и во наредниот период, со фокус на намалување на бројот на сообраќајни несреќи и жртви на патиштата.
…
