Претставничкиот дом на САД усвои резолуција со која се бара повлекување на американските сили од воените дејствија против Иран, сè додека Конгресот не даде формално одобрение за продолжување на операциите. Мерката претставува политички притисок врз претседателот Доналд Трамп, кој ги воведе САД во конфликтот на 28 февруари.
Резолуцијата, предложена од демократите, беше изгласана со 215 гласа „за“ и 208 „против“, при што четворица републиканци исто така ја поддржаа иницијативата. Во текстот се наведува дека Конгресот му наложува на претседателот да ги повлече силите на САД од непријателствата против Иран, мерка која има главно симболичен карактер поради можноста за претседателско вето.
Од редовите на демократите во Комитетот за надворешни работи гласањето го оценија како силна порака против, како што велат, „нелегалната и непопуларна војна“, нагласувајќи дека американската јавност не го поддржува продолжувањето на конфликтот.
Слична иницијатива веќе помина процедурална фаза во Сенатот кон крајот на мај, по неколку неуспешни обиди во претходниот период, што отвора можност за ново гласање во горниот дом на Конгресот.
Иако мерката би можела да биде усвоена и во Сенатот, се очекува претседателот Трамп да стави вето, што би ја блокирало нејзината примена освен ако не се обезбеди двотретинско мнозинство во двата дома на Конгресот.
Според Уставот на САД, воените овластувања се поделени меѓу извршната и законодавната власт, при што Конгресот има клучна улога во одобрувањето на воени ангажмани. Демократите тврдат дека целта на резолуцијата е повторно воспоставување на уставната рамнотежа во однос на воените надлежности.
…
