Според информациите од Институтот за јавно здравје, платата на архивар достигнувала речиси 100.000 денари, а исплати за приправност биле евидентирани и за административни службеници кои, согласно законските прописи, немаат право на таков надомест бидејќи не се медицински персонал.
Дополнително, картички за гориво користеле лица за кои во Институтот немаат никакви податоци ниту сознанија, а преку нив биле потрошени околу 150.000 денари без јасно утврдена одговорност.
Ова, според сегашната директорка на институцијата, Марија Андоновска, претставува само дел од неправилностите и нередот што владееле во текот на 2024 година, но и во претходните години. Таа тврди дека од 2017 година наваму немало суштинска контрола врз работењето на Институтот и очекува надлежните обвинителски органи да поведат постапки против сите инволвирани во евентуални незаконски дејствија.
Андоновска посочи и дека на лица кои веќе биле вработени им биле склучувани дополнителни договори на дело за активности како наводно одржување на зеленило и чистење на дворот, за што месечно добивале и до 88.000 денари. Таа ги потврди и наодите од ревизорскиот извештај, според кои не постоела соодветна евиденција за вакцините, а во одредени периоди, вклучително и за време на епидемија, недостигале и неопходни реагенси.
…
