Премиерот Христијан Мицкоски изрази оптимизам за иднината на евроинтегративниот процес на Македонија, посочувајќи дека неодамнешните средби со францускиот претседател Емануел Макрон и германскиот канцелар Олаф Шолц му дале јасна слика за следните чекори на Европската Унија кон земјата и регионот.
Одговарајќи на новинарски прашања, Мицкоски истакна дека токму преку директните разговори со највисоките европски лидери добил увид во новите иницијативи и механизми што се подготвуваат за Западен Балкан.
„Оптимист сум. Само јас имав средби со Макрон и Шолц и точно знам што следува за Македонија“, порача премиерот.
Тој нагласи дека Владата останува на ставот дека нема да поддржи уставни измени без претходни и јасни гаранции од Европската Унија за заштита на македонскиот идентитет и националните интереси.
Според Мицкоски, Франција и Германија работат на нов пристап кој ќе овозможи поблиска интеграција на земјите од регионот во европските политики и програми, без потреба од измени на постојните договори на Унијата.
„Нивото на односи помеѓу Западен Балкан и Европската Унија е на многу повисоко ниво, ни се отвораат многу повеќе механизми и алатки коишто ќе ги користиме во периодов“, изјави премиерот.
Тој додаде дека во разговорите со европските партнери било констатирано дека Македонија е меѓу најактивните држави во спроведувањето на реформите предвидени со Планот за раст на ЕУ за Западен Балкан.
Иако не откри конкретни детали од билатералните средби, Мицкоски посочи дека дипломатските разговори остануваат доверливи, но изрази уверување дека претстојниот период ќе донесе нови можности за земјата на европскиот пат.
