Премиерот Христијан Мицкоски денеска присуствуваше на пуштањето во употреба на новата фабрика за производство на вафли од брендот „Винчини“, инвестиција вредна 8,5 милиони евра на компанијата „Макпрогрес“.
На свеченоста беше истакнато дека станува збор за инвестиција реализирана со сопствени средства и кредити од комерцијалните банки, вклучително и дел од кредитната линија обезбедена од Владата. Новиот производствен капацитет е изграден за само шест месеци и располага со две современи производни линии за производство на вафли и сродни кондиторски производи наменети за домашниот и странските пазари.
Генералниот директор Глигор Цветанов информираше дека со отворањето на фабриката се отвораат 40 нови работни места, а во текот на следната година се планираат уште 40 нови вработувања поради очекуваното зголемување на производствените капацитети.
Премиерот Мицкоски нагласи дека Владата ќе продолжи да ги поддржува домашните компании и инвестиции, посочувајќи го „Макпрогрес“ како пример за успешен развој на македонски семеен бизнис.
– Импресиониран сум од оваа инвестиција. „Макпрогрес“ од скромен семеен бизнис прерасна во регионален гигант со промет од над 40 милиони евра. Компанијата е еден од темелите на македонската кондиторска индустрија. Како Влада ќе сториме сѐ што можеме за да помогнеме вакви компании да продолжат да растат и да освојуваат нови пазари, особено ако се има предвид дека најголемиот дел од производството е наменет за извоз, изјави Мицкоски.
Тој додаде дека Владата ќе биде партнер на компаниите кои инвестираат, отвораат нови работни места и придонесуваат за економскиот развој на државата.
