Американскиот претседател Доналд Трамп го обвини Иран дека стои зад соборувањето на американскиот борбен хеликоптер AH-64 „Апачи“ во близина на Ормускиот Теснец и најави дека САД ќе возвратат на нападот.
Според информациите од американските власти, двајцата членови на екипажот биле спасени и не претрпеле повреди. Станува збор за прв изгубен хеликоптер од овој тип од почетокот на актуелниот конфликт со Иран.
„Тукушто бев информиран од нашата Голема војска дека синоќа Иранците соборија еден од нашите високософистицирани хеликоптери ‘Апачи’ додека патролираше над Ормускиот Теснец. Имаше двајца пилоти вклучени, двајцата се безбедни и неповредени. Сепак, Соединетите Држави мора, од нужност, да одговорат на овој напад“, напиша Трамп на својата социјална мрежа Truth Social.
Претходно, Централната команда на САД (ЦЕНТКОМ) соопшти дека хеликоптерот се урнал во близина на брегот на Оман за време на патролна мисија. Пилотите биле извлечени околу два часа подоцна со помош на поморски дрон.
Во меѓувреме, претседателот на иранскиот парламент и главен преговарач Мохамед Бакер Калибаф порача дека Техеран останува отворен за дипломатски решенија, но е подготвен и за одмазда доколку биде испровоциран.
„Ние го претпочитаме јазикот на дипломатијата, но многу течно зборуваме и други јазици. Прекршете ги вашите обврски, а ние ќе преминеме на она што најдобро го зборуваме“, напиша Калибаф.
Паралелно со тензиите во Ормускиот Теснец, се влошува и безбедносната состојба на либанско-израелската граница. Израелската армија изврши нови воздушни и артилериски напади врз јужен Либан, при што, според либанското Министерство за здравство, во градот Тир загинале најмалку осум лица.
Новата ескалација повторно го става на тест неодамнешното примирје на Блискиот Исток и ги усложнува напорите за постигнување поширок договор меѓу САД, Израел и Иран.
…
