Вистинска драма се одвивала вчераутро на брегот на реката Вардар во скопската населба Карпош, каде што брзата реакција на случаен минувач спасила човечки живот.
Како што информира Министерството за внатрешни работи, на 12 јуни во 07:40 часот во СВР Скопје било пријавено дека околу 07:00 часот очевидец забележал машко лице како се дави во водите на Вардар и веднаш реагирал.
Според информациите, станува збор за Д.И. (83) од Скопје, кој во моментот на инцидентот се нашол во реката и бил во животна опасност.
Благодарение на навремената и храбра интервенција на очевидецот, мажот бил извлечен од водата пред да дојде до трагичен исход.
На местото веднаш пристигнала екипа на Итната медицинска помош, која му укажала прва помош на повозрасниот скопјанец. По стабилизирањето на неговата состојба, тој бил пренесен во Градската општа болница „8 Септември“ за понатамошно лекување и медицински прегледи.
Од МВР соопштија дека 83-годишникот имал и одредени здравствени проблеми, но засега не се соопштуваат дополнителни детали за околностите под кои завршил во реката.
Увид на местото извршила увидна екипа на СВР Скопје, а надлежните работат на целосно расчистување на случајот.
Благодарение на присебноста и човечноста на случајниот минувач, уште една потенцијална трагедија во Вардар заврши со среќен епилог.
