Премиерот Христијан Мицкоски најави дека по 17 јуни ќе започнат разговорите со коалициските партнери за реконструкција на Владата и можни кадровски промени во извршната власт.
Говорејќи по промоцијата на приватна инвестиција во општина Илинден, Мицкоски посочи дека во наредните денови фокусот ќе биде ставен на партиските активности, а веднаш потоа ќе следуваат политички консултации за освежување на владиниот тим.
„Следната недела е роденденот на ВМРО-ДПМНЕ, што ќе биде на 17 јуни во Струмица, од 20 часот, на стадионот. После тоа, следниот ден веќе почнуваме со разговори со владините коалициони партнери околу реконструкцијата на Владата“, изјави Мицкоски.
Премиерот потсети дека идејата за реконструкција ја најавил уште во август минатата година, нагласувајќи дека станува збор за процес кој треба да донесе нова енергија, поголема ефикасност и побрзо спроведување на реформите.
Според него, промените нема да бидат резултат на незадоволство од работата на актуелните функционери, туку дел од стратегија за засилување на капацитетите на Владата.
„Потребен е подинамичен капацитет и посилно темпо во реализацијата на владината програма и реформите што ги очекуваат граѓаните“, порача премиерот.
Мицкоски истакна дека реконструкцијата ќе биде предмет на разговор со сите коалициски партнери, но во моментов не сакаше да открива детали за можните кадровски решенија и ресорите кои би можеле да бидат опфатени со промените.
Воедно, тој категорично отфрли можност за промени во однос на коалициските партнерства, нагласувајќи дека нема да има вклучување на ДУИ во власта.
„Нема промени во однос на коалицискиот партнер од албанскиот политички блок. ДУИ ќе остане во опозиција уште долго време“, изјави Мицкоски.
Најавената реконструкција доаѓа во период кога Владата влегува во втората година од својот мандат, а јавноста очекува конкретни резултати во економијата, инфраструктурата и реформските процеси.
Повеќе детали за евентуалните кадровски промени и составот на реконструираната влада се очекуваат по средбите што ќе започнат веднаш по 17 јуни.
