Сè поголем број потрошувачи внимателно го следат потеклото на храната што ја купуваат и се обидуваат да изберат поздрави намирници. Иако овошјето и зеленчукот се сметаат за основа на здрава исхрана, тие не секогаш се целосно безбедни од остатоци на пестициди.
Според анализи на организацијата Environmental Working Group, која секоја година објавува листа на овошје и зеленчук со највисоки нивоа на остатоци од пестициди, одредени намирници постојано се наоѓаат на врвот на листата. Целта на овие извештаи, како што се наведува, не е да се обесхрабри консумацијата, туку да се зголеми информираноста и да се промовираат подобри навики при изборот и подготовката на храната.
Спанаќот и лиснатиот зеленчук најзагрозени
Според податоците, суровиот спанаќ редовно е меѓу намирниците со најголемо количество остатоци од пестициди. На листата се наоѓаат и кељот, раштиката и листовите од синап.
Експертите предупредуваат дека дел од анализираните примероци содржат супстанции поврзани со потенцијални здравствени ризици. Затоа се препорачува темелно миење, отстранување на надворешните листови и, кога е можно, избор на органски производи.
Јагоди, грозје и јаболка под посебно внимание
Јагодите со години се меѓу овошјата со највисоки нивоа на остатоци од пестициди, главно поради начинот на нивно одгледување и структурата на плодот.
Слична ситуација има и со грозјето, кое поради тенката кожица и густо наредените зрна тешко се чисти темелно, па така може да задржи повеќе хемиски остатоци.
Меѓу ризичните намирници често се наоѓаат и јаболките, бресквите, нектарините и црешите. Кај јаболките се препорачува темелно миење, а во некои случаи и лупење на кората, иако така се губи дел од корисните влакна и витамини.
Боровинки, круши и капини исто така на листата
Боровинките, поради природниот восочен слој, можат подолго да задржат остатоци од пестициди, па експертите советуваат органски варијанти кога тоа е можно. Како алтернатива се наведуваат и замрзнатите производи.
На листата се наоѓаат и круши и капини, кои исто така може да содржат повисоки нивоа на остатоци од хемиски средства.
И кромпирот под лупа
Оваа година на листата се најде и кромпирот. Иако расте во земја, тој може да апсорбира пестициди од почвата, а дополнително понекогаш се третира и при складирање.
Поради тоа, експертите препорачуваат лупење на кромпирот пред подготовка и консумација.
Нема простор за паника
И покрај предупредувањата, нутриционистите нагласуваат дека нема причина за целосно избегнување на овошјето и зеленчукот. Тие остануваат клучен дел од здравата исхрана.
Според нив, едноставни мерки како темелно миење, лупење кога е соодветно и избор на проверени или органски производи можат значително да ја намалат изложеноста на пестициди, без да се откажеме од овие важни намирници.
…
