Вицепремиерот и министер за транспорт и врски, Александар Николоски, на министерскиот самит за транспорт во организација на Секретаријатот на Транспортната заедница говореше за плановите и развојот на патната и железничката инфраструктура на Коридорот 10 и Коридорот 8.
Николоски истакна дека самитот испраќа јасна порака за заедничка посветеност на земјите низ кои минува Коридорот 10, нагласувајќи дека неговата изградба ќе придонесе тој да стане економски најзначајниот транспортен коридор во Европа.
Според него, со реализацијата на планираните инфраструктурни проекти значително ќе се намали времето на патување и транспорт на стоки во регионот.
„Скопје – Солун ќе се патува за 1 час и 25 минути, Скопје – Белград за два и пол часа, додека товарен воз од Атина ќе стигнува до Виена за помалку од 24 часа. Од Солун до Будимпешта товарниот железнички сообраќај ќе се одвива за околу 12 до 14 часа“, посочи Николоски.
Тој оцени дека модернизацијата на транспортната инфраструктура долж Коридорот 10 ќе донесе побрз проток на луѓе и стоки, поголема економска поврзаност и нови можности за развој на земјите од регионот.
…
