Од градот ВЛЕН започна теренскиот караван по нејзиното консолидирање во единствен политички субјект, при што копретседателите Изет Меџити и Биљал Касами ја започнаа теренската агенда со посета на градот Дебар.
Првата станица од караванот беше Дебар, каде беа разгледани тековните и планираните проекти што се реализираат под раководство на градоначалникот Фисник Мела. Посебен акцент беше ставен на изградбата на нов паркинг во центарот на градот со капацитет од околу 250 паркинг-места, инвестиција вредна приближно 350 илјади евра.
Од ВЛЕН порачуваат дека проектот има цел да ја подобри урбаната инфраструктура и да ги олесни условите за секојдневно функционирање на граѓаните, истовремено нагласувајќи дека децентрализацијата и јакнењето на општините остануваат еден од клучните приоритети на нивната политика.
Во рамки на посетата беше потенцирана и важноста на стратешките проекти како „One Stop Shop“ на граничните премини Блато и Ќафасан, кои според нив ќе придонесат за олеснет проток на луѓе и стоки, зајакнување на економските врски и регионален развој.
Од коалицијата посочија дека Дебар претставува пример за локално управување кое, како што наведуваат, успешно ги претвора визиите во конкретни резултати за граѓаните, со повеќе паралелни инвестиции што придонесуваат за подобрување на квалитетот на живот.
„ВЛЕН на работа. Наш дел“, се наведува во пораката на коалицијата.
…
