Жителите на три скопски улици ќе останат без вода од утре попладне поради планирани зафати на водоводната мрежа, информира ЈП Водовод и канализација.
Според најавата, утре од 18:00 часот на улицата „Никола Парапунов“ ќе се врши санација на два затворачи со профил Ф400 мм и Ф500 мм, доколку бидат обезбедени потребните технички услови за изведување на интервенцијата.
Поради зафатот, прекин во водоснабдувањето ќе имаат корисниците на улицата „Никола Парапунов“, дел од улицата „Разловечко Востание“ и дел од улицата „Вич“.
Од претпријатието посочуваат дека нормализирањето на водоснабдувањето се очекува околу 12:00 часот во сабота.
Во случај да не бидат исполнети техничките предуслови, интервенцијата ќе биде одложена за друг термин, додаваат од ЈП Водовод и канализација.
