Македонија од следната недела ќе биде под влијание на силен суптропски антициклон, кој ќе донесе стабилно, суво и претежно сончево време, проследено со значително повисоки температури.
Според најавите, до вторник, 30 јуни, низ целата земја ќе преовладува вистински летен режим на времето. Дневните температури насекаде ќе бидат над 30 степени Целзиусови, додека во Повардарието и во југоисточните делови на државата живата во термометарот ќе се искачи до околу 40 степени.
Покрај високите температури, повремено ќе дува умерен до засилен фенски ветер од источен и североисточен правец, што дополнително ќе придонесе за суво и жешко време.
Метеоролозите препорачуваат граѓаните да избегнуваат подолг престој на отворено во најтоплиот дел од денот, да внесуваат доволно течности и да се заштитат од директното сончево зрачење, особено децата, повозрасните лица и хронично болните.
Доколку прогнозите се остварат, Македонија ќе влезе во првиот позначаен топлотен бран ова лето, со услови за тропски денови и топли ноќи во повеќе региони низ земјата.
…
