Иран возврати со ракетни напади врз американски бази во Бахреин и Кувајт, Трамп се закани со „уништување“ на Исламската Република
Тензиите на Блискиот Исток повторно ескалираа откако Соединетите Американски Држави извршија нови воздушни напади врз цели во Иран, како одговор на напад со беспилотно летало врз трговски брод под панамско знаме во Ормускиот Теснец.
Американската Централна команда (CENTCOM) соопшти дека нападите биле насочени кон повеќе воени цели низ Иран, оценувајќи дека станува збор за директен одговор на, како што наведоа, „континуираната агресија“ врз меѓународниот комерцијален поморски сообраќај.
Според соопштението, погодени биле десет воени цели на различни локации во и околу Ормускиот Теснец. Меѓу нив се воена опрема, комуникациски системи, позиции на противвоздушната одбрана, како и објекти за складирање беспилотни летала.
Како одговор, Иранската револуционерна гарда објави дека лансирала балистички ракети и беспилотни летала кон американска инфраструктура и воени бази во Кувајт и Бахреин, тврдејќи дека целите биле успешно погодени и уништени.
Во своето соопштение, Гардата порача дека, согласно меморандумот за разбирање потпишан овој месец, Иран има договори поврзани со контролата на пловидбата низ Ормускиот Теснец и најави построги мерки против бродовите што ќе ги прекршуваат правилата.
„На секоја потенцијална непријателска агресија, без разлика под каков изговор ќе биде изведена, ќе следува уништувачки одговор“, наведоа од Иранската револуционерна гарда.
Во меѓувреме, САД и Иран меѓусебно се обвинија за прекршување на договорот за прекин на огнот.
Од CENTCOM соопштија дека на Иран му била дадена можност да го почитува договорот, но дека тоа не се случило откако ирански дронови погодиле танкер под панамско знаме, по што следувал американскиот воен одговор.
По нападите, американскиот претседател Доналд Трамп испрати остра порака до Техеран.
„Многу е можно Иран никогаш да не научи. Може да дојде момент кога повеќе нема да можеме да бидеме разумни и ќе бидеме принудени воено да ја завршиме работата што многу успешно ја започнавме. Ако тоа се случи, Исламската Република Иран повеќе нема да постои“, изјави Трамп.
Во меѓувреме, властите во Кувајт и Бахреин потврдија дека нивните системи за противвоздушна одбрана биле активирани по иранските напади.
И покрај новата ескалација, CENTCOM соопшти дека комерцијалниот поморски сообраќај низ Ормускиот Теснец засега продолжува без прекин.
Најновата размена на напади доаѓа помалку од 24 часа по претходните американски воздушни операции, за кои Вашингтон соопшти дека биле изведени како одговор на нападот со беспилотно летало врз товарен брод што пловел под панамско знаме во Ормускиот Теснец.
