Одделението за внатрешни работи Струга поднесе кривична пријава против Н.С. (42) од струшко село поради постоење основи на сомнение дека сторила кривично дело „запуштање и малтретирање дете“ согласно член 201 став 1 од Кривичниот законик.
Според информациите од Секторот за внатрешни работи Охрид, пријавената во текот на ноќта меѓу 8 и 9 јуни годинава ги оставила своите две малолетни деца да спијат во нејзиното патничко возило додека таа била на работа.
По добиените сознанија и во координација со јавен обвинител, полициски службеници презеле соодветни мерки и излегле на терен.
При контролата, на земјениот паркинг на улицата „Владо Малески“ во Струга, полицијата ги затекнала двете деца како спијат сами во паркираниот автомобил.
По целосното документирање на случајот, против 42-годишната жена е поднесена кривична пријава за кривично дело „запуштање и малтретирање дете“, а понатамошната постапка ќе се води согласно насоките на надлежното јавно обвинителство.
