Седум лица побарале медицинска помош по истекување на амонијак од камион-ладилник во текот на ноќта во Гуча, Србија. Од нив, четворица биле префрлени во болницата во Чачак на дополнителни прегледи, но според надлежните, никој не е животно загрозен.
Градоначалникот на општина Лучани, Милија Миленковиќ, изјави дека повеќето од лицата кои се јавиле во Здравствениот дом биле исплашени по инцидентот.
– Седум лица дојдоа во Здравствениот дом во Гуча, од кои четворица беа испратени во болницата во Чачак за дополнителни прегледи. Ничиј живот не беше во опасност, претежно станува збор за луѓе кои беа вознемирени од несреќата – изјави Миленковиќ.
Тој посочи дека кога надлежните пристигнале на местото на настанот околу еден час по полноќ, таму веќе интервенирале противпожарни екипи и службите за итна медицинска помош.
Според него, причината за истекувањето бил безбедносен вентил кој пукнал поради висок притисок во системот.
– Кога се приближивме, видовме дека безбедносниот вентил пукнал. Најверојатно имало голем притисок во системот, а токму вентилот спречил да дојде до многу поголема несреќа. Екипите успеаја да го заменат вентилот и да го санираат дефектот, но останаа на терен како мерка на претпазливост – рече Миленковиќ.
По инцидентот, граѓаните биле итно предупредени преку звучни сигнали и возила со разглас да не ги напуштаат своите домови и да ги затворат прозорците поради можната опасност од изложеност на амонијак.
Несреќата се случила околу 00:50 часот, кога дошло до истекување на амонијак од камион-ладилник. Министерството за внатрешни работи на Србија веднаш издало итно предупредување до жителите, а надлежните служби брзо интервенирале за да го локализираат дефектот и да спречат поголеми последици.
