Основното јавно обвинителство Скопје потврди дека смртта на жената од скопското село Таор, чие безживотно тело беше пронајдено во близина на селото Летевци, е последица на насилство. За убиството е осомничен нејзиниот поранешен сопруг, кој е лишен од слобода, а во врска со случајот се приведени уште три лица.
Дежурен јавен обвинител, заедно со екипи на Министерството за внатрешни работи, во текот на ноќта извршил увид на тешко пристапен шумски терен во близина на селото Летевци, каде што било пронајдено телото на 48-годишната жена.
Жртвата претходно била пријавена за исчезната во петокот, по што биле преземени интензивни активности за нејзино пронаоѓање.
По наредба на јавниот обвинител, врз телото била извршена обдукција, која потврдила дека смртта настапила како последица на насилство.
Под сомнение дека го сторил кривичното дело е лишен од слобода поранешниот сопруг на жртвата, додека во рамки на истрагата се приведени и тројца негови пријатели, за кои се испитува нивната евентуална поврзаност со случајот.
Од Основното јавно обвинителство Скопје информираат дека се преземаат повеќе истражни дејствија со цел целосно расчистување на случајот, утврдување на мотивите и на сите околности под кои е извршено убиството.
Истрагата продолжува, а по обезбедувањето на сите докази, Обвинителството ќе донесе одлука за понатамошната кривична постапка против осомничените.
