Полицијата во Тетово уапси 65-годишна државјанка на Република Албанија, осомничена дека измамила 67-годишен тетовец за вкупно 3.400 евра, претставувајќи се лажно како универзитетска професорка.
Како што соопшти Министерството за внатрешни работи, на 27 јуни 2026 година околу 11:00 часот, полициски службеници од СВР Тетово ја лишиле од слобода Н.Б. (65) на крстосницата на улиците „Видоје Смилевски Бато“ и „29 Ноември“ во Тетово.
Апсењето следувало по пријава поднесена претходниот ден од 67-годишен жител на Тетово, кој пријавил дека во изминатите три месеци во неколку наврати ѝ позајмувал пари на жена која се претставувала како универзитетска професорка.
Според пријавата, осомничената му кажувала дека нејзината ќерка доживеала тешка сообраќајна несреќа во Франција и дека итно ѝ се потребни средства за лекување. Верувајќи во нејзината приказна, оштетениот ѝ предал вкупно 3.400 евра.
Од МВР информираат дека Н.Б. е осомничена за сторено кривично дело „измама“ по член 247 од Кривичниот законик.
По целосно расчистување и документирање на случајот, против неа ќе биде поднесен соодветен поднесок.
