Регулаторната комисија за енергетика (РКЕ) донесе нова одлука за цените на нафтените деривати, со која од полноќ ќе стапат во сила нови малопродажни цени. Во просек, цените се намалуваат за 0,27 отсто, но бензините ќе поскапат, додека дизелот ќе поевтини.
Според одлуката, од 30 јуни во 00:01 часот, малопродажната цена на ЕУРОДИЗЕЛ БС (Д-Е V) се намалува за 0,50 денари по литар и ќе изнесува 80 денари за литар.
Од друга страна, бензините ЕУРОСУПЕР БС-95 и ЕУРОСУПЕР БС-98 поскапуваат за 0,50 денари по литар. Така, новата цена на ЕУРОСУПЕР БС-95 ќе биде 84,50 денари за литар, додека ЕУРОСУПЕР БС-98 ќе се продава по 86,50 денари за литар.
Цената на екстра лесното масло за домаќинство (ЕЛ-1) останува непроменета и ќе изнесува 79,50 денари за литар, додека мазутот поевтинува за 0,796 денари по килограм и ќе се продава по цена од 41,495 денари за килограм.
Од РКЕ информираат дека на светските пазари референтните цени бележат намалување кај сите нафтени деривати, но врз конечната пресметка влијаел и повисокиот курс на американскиот долар во однос на денарот во споредба со претходниот пресметковен период.
Од Комисијата потсетуваат дека станува збор за максимално дозволени малопродажни цени, а трговците имаат можност горивата да ги продаваат и по пониски цени од утврдените.
…
