Англија со голем пресврт ја совлада ДР Конго со 2:1 и обезбеди место во осминафиналето на Светското првенство, а херој на „Гордиот Албион“ беше Хари Кејн, кој со два погодоци го сврте резултатот во корист на својот тим.
ДР Конго шокантно поведе уште во 7. минута. По нафрлување на капитенот Шансел Мбемба, Џед Спенс лошо реагираше, а Брајан Сипенга ја искористи грешката и ја затресе мрежата на Џордан Пикфорд за 1:0.
Англичаните создадоа неколку добри можности до крајот на првото полувреме. Маркус Рашфорд беше блиску до израмнување, но Арон Ван-Бисака расчисти од гол-линијата, додека Јоан Виса на спротивната страна ја погоди стативата.
Во финишот на првиот дел Хари Кејн најпрво не успеа да избори пенал, а потоа пропушти и одлична можност кога од непосредна близина шутираше директно во голманот Лионел Мпаси.
Сепак, капитенот на Англија се искупи во второто полувреме. Во 75. минута Ентони Гордон испрати прецизна топка до Кејн, кој од непосредна близина израмни на 1:1.
Само 11 минути подоцна следуваше целосниот пресврт. По одбраната на Мпаси по ударот на Џуд Белингам, Гордон повторно беше асистент, а Кејн со прецизен удар го постави конечниот резултат 2:1 и стигна до својот петти погодок на шампионатот.
ДР Конго имаше шанса да избори продолженија во судиското надополнување, но Јоан Виса не беше прецизен од ветувачка позиција.
И покрај елиминацијата, популарните „Леопарди“ оставија силен впечаток со настапите на турнирот и ја напуштаат сцената со кренати глави.
Во осминафиналето Англија ќе се соочи со кодомаќинот Мексико. Натпреварот е закажан за 6 јули на стадионот „Астека“ во Мексико Сити.
…
