Европската комисија планира да изврши прераспределба на финансиските средства наменети за поддршка на реформските процеси во земјите од Западен Балкан, при што поголем дел од средствата би биле насочени кон државите кои покажуваат најголем напредок во процесот на приближување кон Европската Унија.
Според информации на „Еуроњуз“, потврдени од двајца претставници на ЕУ, Црна Гора, Албанија и Северна Македонија се меѓу земјите кои би можеле да добијат зголемен дел од средствата, како резултат на подобрено спроведување на реформските агенди.
Од друга страна, земјите кои заостануваат во реформскиот процес, како Босна и Херцеговина, Косово и Србија, би можеле да се соочат со намалување или губење на дел од предвидените средства.
Од Европската комисија појаснуваат дека, доколку реформските чекори не се реализираат во утврдените рокови, средствата можат да бидат пренасочени кон други корисници кои покажуваат поголем напредок.
„Комисијата ќе спроведе детална и објективна проценка на сите земји-кориснички“, соопшти портпарол на ЕУ, додавајќи дека реформите остануваат клучен услов за користење на средствата од Планот за раст за регионот.
Конечната распределба на средствата се очекува да биде појаснета во наредниот период, по консултациите со земјите-членки на Европската Унија.
