Министерството за финансии целосно ја исплати еврообврзницата во износ од 700 милиони евра, која беше издадена во 2020 година, со што државата ја затвори една од најголемите финансиски обврски од претходниот период.
Премиерот Христијан Мицкоски информираше дека обврската е сервисирана предвреме, што, според него, овозможило заштеда од неколку милиони евра по основ на камати и претставува важен чекор кон стабилизирање на јавните финансии.
„Еврообврзницата од 700 милиони евра, која беше издадена во 2020 година, е целосно исплатена. Со предвременото сервисирање успеавме да заштедиме неколку милиони евра камати, а истовремено испраќаме јасна порака дека државата води одговорна и дисциплинирана фискална политика“, истакна Мицкоски.
Премиерот посочи дека во изминатите две години Владата се соочила со сериозни финансиски обврски наследени од претходниот период, но и покрај тоа успеала навремено да ги сервисира.
Според неговите податоци:
– Исплатена е еврообврзницата од 700 милиони евра издадена во 2020 година;
– Со предвремената исплата се заштедени неколку милиони евра камати;
– Во изминатите две години се сервисирани или репрограмирани обврски во вкупна вредност од околу 4,6 милијарди евра.
Мицкоски нагласи дека повеќе од три четвртини од сервисираните обврски потекнуваат од периодот на седумгодишното владеење на СДСМ и ДУИ.
„Ние тековно и одговорно ги сервисираме тие огромни обврски, но истовремено наоѓаме средства за нови развојни проекти и за крупни инфраструктурни инвестиции кои граѓаните веќе можат да ги видат на дело“, изјави премиерот.
Од Владата оценуваат дека навременото сервисирање на долговите ќе придонесе за постепено намалување на јавниот долг, подобрување на финансиската стабилност и создавање повеќе простор во Буџетот за реализација на капитални проекти и инвестиции.
Според премиерот, целта е паралелно со редовното исполнување на финансиските обврски да продолжи инвестицискиот циклус во инфраструктурата, енергетиката, здравството и образованието, без дополнително оптоварување на јавните финансии.
