Втор ден по ред, повеќе јавни институции низ Бугарија добиваат пријави за наводно поставени експлозивни направи, соопшти Министерството за внатрешни работи на земјата.
Закани за бомби биле испратени до институции во голем број градови, меѓу кои Бургас, Јамбол, Разград, Стара Загора, Смолјан, Трговиште, Варна, Добрич, Силистра, Велико Трново, Благоевград, Ловеч, Пазарџик, Видин, Хасково, Карджали, Шумен, Плевен, Монтана и Габрово.
Полицијата веднаш започнала проверки на пријавените локации и ги применува стандардните безбедносни процедури при вакви закани.
Во Софија била евакуирана Судската палата откако околу 10:30 часот била примена пријава за поставена експлозивна направа. Полициски екипи извршиле детални проверки на објектот.
Евакуација поради безбедносни причини била спроведена и во судот во Смолјан, откако Окружниот суд и Окружното обвинителство добиле заканувачка електронска порака.
Во Стара Загора, институциите во зградата на судот привремено ја прекинале работата додека траеле проверките. Рочиштата биле одложени, а новите термини ќе бидат дополнително определени.
Во дел од градовите, како Благоевград, полицијата не наредила евакуација, туку извршила проверка на просториите додека вработените продолжиле со редовната работа.
Дополнителни дојави биле пријавени и во Шумен, каде што полициски тимови извршиле безбедносни проверки.
Засега нема информации дека на некоја од локациите е пронајдена експлозивна направа. Надлежните продолжуваат со истрагата за потеклото на заканувачките пораки испратени до институциите.
…
