Поранешниот унгарски премиер Виктор Орбан привлече големо внимание на овогодишниот Собор на трубачите во Гуча, каде што викендов престојуваше како гостин на една од најпознатите музички манифестации во Србија. Неговото присуство го потврдија повеќе српски медиуми.
Според снимките и објавите што се споделуваат на социјалните мрежи, Орбан бил во видно опуштено расположение, уживал во звуците на трубите и традиционалната српска музика, а вечерта ја продолжил во еден од локалните ресторани.
Во текот на престојот тој прошетал и низ главните улици на Гуча, каде што неговото појавување предизвикало големо внимание. Посетители му приоѓале за да го поздрават и да се фотографираат со него, а Орбан без поголема дистанца комуницирал со присутните.
Регионалните медиуми претходно објавија и фотографии од Орбан во локален угостителски објект, каде што пробал специјалитети од овој крај. На социјалните мрежи дополнително се споделуваат снимки на кои се гледа како наздравува и ужива во атмосферата создадена од трубачките оркестри.
Гуча годинава е домаќин на 65. издание на традиционалниот Драгачевски собор на трубачите, кој според официјалната програма се одржува од 7 до 9 август.
Орбан во моментов е поранешен премиер на Унгарија, откако по изборите годинава премиерската функција ја презеде Петер Маѓар.
Судејќи според реакциите и снимките што се шират на социјалните мрежи, појавувањето на Орбан стана една од позабележителните приказни од годинашниот собор во Гуча.
