Соединетите Американски Држави извршија нова серија напади врз ирански воени цели во близина на стратешки важниот Ормутски Теснец, во момент на нова и опасна ескалација на тензиите меѓу Вашингтон и Техеран.
Според информациите што новинарот на „Аксиос“, Барак Равид, ги добил од висок американски функционер, американската војска во повеќе одделни напади погодила ирански ракетни системи, средства за противвоздушна одбрана и мали брзи нападни чамци управувани од Корпусот на исламската револуционерна гарда (ИРГЦ).
Целите биле распоредени на повеќе локации во поширокиот регион на Ормутскиот Теснец. Информациите за новиот бран американски напади ги пренесе и „Ројтерс“, повикувајќи се на извештајот на „Аксиос“.
Нападите следуваат по одлуката на иранската Револуционерна гарда да прогласи затворање на Ормутскиот Теснец „до понатамошно известување“. Според иранското соопштение, мерката треба да остане во сила сè додека САД не го прекинат своето вмешување во регионот.
Состојбата околу теснецот дополнително се влоши по претходните инциденти со комерцијални бродови и новата размена на напади меѓу американските и иранските сили. Асошиејтед прес јавува дека нови американски удари биле насочени кон ирански воени капацитети во близина на теснецот, додека Техеран возвратил со напади во регионот.
Ормутскиот Теснец е една од најважните поморски точки за светската трговија со енергенси, поради што секое сериозно нарушување на пловидбата може да има последици врз глобалните пазари и цените на енергијата.
Иако Иран објави дека теснецот е затворен, американската страна тврди дека поморскиот коридор останува отворен за комерцијален сообраќај и дека американските сили се подготвени да ја обезбедат слободата на пловидба.
Најновите напади дополнително го зголемуваат ризикот од поширока воена ескалација во регионот, додека вниманието на светската јавност е насочено кон следните чекори на Вашингтон и Техеран.
