Швајцарија ја зазеде врвната позиција на листата на најпаметни земји во светот, според новото рангирање на веб-страницата „Ворлд оф кард гејмс“. Со впечатлив резултат од 92,02 поени од 100, швајцарската доминација се должи на комбинацијата од бројни Нобелови номинации, висок просечен IQ и значителен удел на образовани граѓани.
Според податоците, Швајцарија бележи 1.099 номинации за Нобелова награда, просечен IQ од 99,24 и 40,02% од возрасните имаат најмалку основен академски степен, додека 18,05% се магистрирани. „Првото место на Швајцарија покажува дека една мала земја може да постигне големи резултати кога се фокусира на квалитет, а не на квантитет“, коментира Холгер Синдбаек, основач на „Ворлд оф кард гејмс“.
Велика Британија се најде на второто место со вкупен резултат од 89,4, благодарение на 2.393 номинации за Нобелова награда и речиси 40% возрасни со факултетска диплома. САД заземаа третата позиција (89,18), предводени од најголемиот број Нобелови номинации – 5.717 – и универзитети со 256 добитници на ова престижно признание.
Европските земји доминираат на листата: Холандија (четврто место, IQ 100,74), Белгија (петто место, IQ 97,49), Шведска, Германија, Полска, Данска и Финска. Интересно е дека Финска бележи највисок просечен IQ – 101,20, додека Полска предничи по процент на население со магистратура, со 22,31%.
Анализата на „Ворлд оф кард гејмс“ ја комбинира бројката на Нобелови номинации, просечниот IQ и образовното ниво на населението, создавајќи единствен индекс за интелигенција на нациите. Иако ова не е академско истражување, резултатите нудат интересен поглед на глобалните разлики во образованието и научното влијание.
„Најуспешните држави инвестираат во повеќе области – од универзитети од светска класа до обезбедување можност за што поголем број луѓе да стекнат академски дипломи. Придобивките се повеќекратни“, додава Синдбаек.
Во основа, ова рангирање не треба да се сфати како конечна оцена на интелигенцијата на поединечните нации, туку како илустрација на тоа како образованието и научното истражување обликуваат паметни и способни општества.
