Лубеницата е едно од омилените летни освежувања, но повеќето луѓе ги фрлаат нејзините семки без да знаат дека тие содржат вредни хранливи материи. Нутриционистите посочуваат дека, по правилна подготовка, семките од лубеница можат да бидат здрава алтернатива на чипсот и другите индустриски грицки.
Откако ќе се испечат, семките стануваат крцкави и вкусни, а истовремено содржат малку калории и се богат извор на магнезиум, железо, цинк и здрави незаситени масти.
Магнезиумот има важна улога во функционирањето на мускулите и нервниот систем, придонесува за здравјето на срцето и коските, а е значаен и за нормалното функционирање на имунолошкиот систем.
Семките содржат и железо, кое е неопходно за создавање хемоглобин и транспорт на кислород низ организмот, како и цинк, минерал што придонесува за зајакнување на имунитетот, обновување на клетките и заздравување на ткивата.
Покрај тоа, тие се извор на мононезаситени и полинезаситени масни киселини, кои се поврзуваат со подобро кардиоваскуларно здравје и можат да помогнат во одржување на нормално ниво на холестерол како дел од балансирана исхрана.
Подготовката е едноставна. Семките најпрво треба добро да се измијат и исушат, а потоа да се распоредат во тава и да се печат околу 15 минути во рерна загреана на 160 степени Целзиусови. По желба може да се додадат малку маслиново масло, сол или зачини како цимет, чили, кајенски бибер или лимета.
Иако не содржат големи количини витамини и минерали во една порција, семките од лубеница се значително похранлива опција од многу преработени грицки. Воедно, нивното користење придонесува и за намалување на фрлањето храна, бидејќи се искористува речиси целиот плод на лубеницата.
…
